Ginalantaw sang human rights lawyer nga mabasura na lamang ang duha ka ulihi nga impeachment complaint batok kay President Ferdinand “Bongbong” Marcos Jr. kun mapasaka na sa House Committee on Justice ang una nga impeachment complaint.
Madumduman nga ang una nga complaint ang ginsumiter ni Atty Andre De Jesus kag gin-endorso ni Pusong Pinoy party-list Rep. Jernie Nisay.
Ang ikaduha ang ginfile naman sang Bagong Alyansang Makabayan, kag ang ika-tatlo ang ginfile nanday former Congressman Mike Defensor kag Jacinto Paras, former Ilocos Sur governor Chavit Singson, Atty Ferdinand Topacio, Atty Manuelito Luna kag Atty Harold Respicio, kasubong man ang vlogger nga si Mary Catherine Binag.
Sa interview sang Bombo Radyo Bacolod kay Atty Cesar Beloria, apisar nga wala ginbatun sang Office of the Secretary General ang duha ka ulhi nga impeachment complaint, ini ang ginakonsiderar sang complainant nga tindered ukon filed na.
Wala ginbatun ang complaints sa panindugan nga wala si Secretary General Cheloy Garafil, samtang suno sa iya 2nd in command, siya ang indi authorized nga magbatun.
Suno kay Beloria, indi pwede nga maghalin ang opisyal nga wala sang gintalana nga maga-assume sang responsibilidad ilabi na sa mga importante nga trabaho.
Nagapati si Beloria nga ginahingagaw na sang duha ka kampo nga nagfile nga malagas ang una nga impeachment complaint antes paman magsaka sa Committee on Justice.
Ini bangod kun magdangat na sa House Committee on Justice, ini ang makonsiderar na nga initiated complaint.
Pinaagi sini, ibasura na ang duha ka mga ulihi nga complaints kag ma-apply naman ang one-year bar rule, nga nagakahulugan nga kinahanglan pa maghulat nga matapos ang isa ka tuig antes liwat nga makafile.
Pahayag ni Beloria nga naghingagaw file ang duha ka grupo bangod nakita nila nga madismiss lamang ang una nga ginfile bangod sa wala sang substance ang mga ebidensya kag nakabase lamang sa mga screenshot.
Apang indi man kompormi ang abogado sa una nga pahayag ni Garafil nga indi ini interesado sa impeachment complaint.
Suno diri, mas maayo nga maghipos na lamang ang opisyal kag batunon ang complaints, bangod ini ang iya trabaho.
