Nagapati ang human rights lawyer nga ang nagapanguna nga rasun sa pagpostpone sang Barangay and Sangguniang Kabataan Elections amo ang pagtuman sa political promise sang administrasyon sa mga Barangay officials.
Sa interview sang Bombo Radyo Bacolod kay Atty Cesar Beloria, wala na ini nakibot sa pagpirma ni President Ferdinand “Bongbong” Marcos Jr. sa postponement sang Disyembre 1, 2025 BSKE sa masunod nga tuig sa Nobyembre 2, 2026.
Ini bangod una na ini nga ginpahibalo sang Malacañang kag Comission on Election chairman.
Apang ginapaabot na ni Beloria nga may magafile sang petisyon sa Korte Suprema, ilabi na nga una na nga nagpagwa sang ruling ang Higher Court nga unconstitutional ang mga nagligad nga postponement.
Aminado man ang abogado nga kinahanglan nga may adbokasiya gid ang magafile sang complaint bangod ini ang mahakog sa oras kag kwarta.
Suno kay Beloria, dako ang mauyang sa pondo sang gobyerno kun indi madayun ang eleksyon sa Disyembre bangod yara na sa milyon ukon bilyon ang balor nga gingastos sa preparasyon, kaangay lamang sang mga naprint na nga dokumento nga kinahanglan liwaton bangod may naglain sa petsa.
Para sa abogado, nagakaigo lamang ang postponement sang eleksyon para sa mga indi mapunggan nga sitwasyon kaangay sang gyera.
Kun ang ponto lamang amo ang pagfix sang term of office, suno kay Beloria sarang man nga ini ang ipatuman matapos na lamang sang eleksyon.
Gani nagapati ang abogado nga ang mayor gid nga rasun kun ngaa ginduso ang postponement sang BSKE, amo ang pagtuman sa political promise sa nakaligad nga eleksyon agud makuha ang suporta sang mga Barangay officials.
Apang dako ang pagpati ni Beloria nga kun may magfile sang petisyon, mahimo nga maggrant ang Korte Suprema sang Temporary Restraining Order ukon ideklarar nga unconstitutional ang napasar nga layi.
Ini man ang rasun kun ngaa padayun ang preparasyon sang Comelec apisar nga nangin layi na ang postponement
