Aminado ang human rights lawyer nga may ginhatag nga mas mataas nga pabor sa pag-aresto kay expelled Negros Oriental Congressman Arnolfo “Arnie” Teves Jr. indi parehas sa ordinaryo nga mga priso.
Sa interview sang Bombo Radyo Bacolod kay Atty Ceasar Beloria, maximum security kag indi maximum tolerance ang ginhimo sang Timor Leste government sa pagdeport kay Teves kun sa diin ini ang nakaposas pa bisan sa tiil.
Ini bangod una na nga nadeklarar nga terorista sang Philippine Government si Teves, gani ini ang makabig nga threat nga mahimo rasun man kun ngaa gindeport ini pabalik sa Pilipinas.
Suno diri, ang ginadeklarar nga terrorist ukon transnational criminals ang makabig kontra sang bilog nga kalibutan.
Kabahin sa turn over condition sang Timor Leste sa Pilipinas nga mahatagan sang due process si Teves.
Apang suno kay Beloria, ini ang indi na kinahanglan i-apelar sang Timor Leste bangod may lain nga jurisdiction ang Pilipinas.
Sa baylo, nakita ni Beloria nga wala lamang ginhatagan sang due process si Teves, sa baylo ginhatagan pa ini sang sobra sa normal.
Pasalig sini nga wala ginpigos ang anay kongresista sa pag-abot sa Pilipinas, sa baylo, ginhatagan ini sang tyansa nga makaatubang sa abogado kag sa iya asawa, kag ginpahanugutan pa nga makapatigayon sang press conference.
Sa masami, ang mga wanted person nga madakpan, ang ginadala sa korte, gina-arraign, ginapriso kag ginapatawag na lamang sa tion sang trial.// Iban sa mga ini ang ginaposas pa sa likod kag ginaparade padulong sa court room.
Apang kaangay nga may special treatment pa sa kay Teves gikan sa National Bureau of Investigation.
Suno kay Beloria, kuntani patas ang treatment sa tanan nga mga priso.
Gintransfer naman ang mga kaso ni Teves sa mga korte sa Manila, apang bangod sa kadamo sang kaso sini, ginalantaw ni Beloria nga may iban pa ini nga kaso nga nabilin sa korte sa Negros Oriental.
Nahibaluan nga may multiple counts sang murder kag frustrated murder cases nga ginfile batok kay Teves bangod sa pagpatay kay late Negros Oriental Governor Roel Degamo kag siyam ka iban pa.
Apang magluwas diri, may tatlo pa ka separado nga murder charge batok sa iya, may-ara man sang illegal possession of firearms and explosives.
Nagapati si Beloria nga sa kadamuon sang kaso nga ginfile batok kay Teves, madugayan pa ang mga kaso sini.
