Ginalantaw sang abugado sa ciudad sang Bacolod nga ang pagfile sang petition batok sa implementasyon sang Negros Island Region Act sa Korte Suprema, ang agud malikawan nga may malapakan nga kinamatarong kag mga kahalitan ukon damages nga matuga sini.
Madumduman nga sang Biyernes, anum ka mga residente sang Negros Oriental kag Siquijor ang nagfile sa Korte Suprema sang petition agud nga mapunggan ang pagpatuman sang Republic Act 12000 ukon ang Negros Island Region Act kag ini ang ideklarar nga unconstitutional.
Sa interview sang Bombo Radyo Bacolod kay Atty. Caesar Beloria, human rights lawyer, sa personal sini nga panan-awan nagakaigo lamang ang ginhimo sang mga nagfile sang petition sa Korte Suprema bangud may yara na sang layi nga makapugong sa pagpatuman.
Suno kay Beloria, indi man mahimo nga magfile sang petition sang wala pa sang layi bangud kwestyunon ini sang Korte Suprema.
Dugang pa sang abugado nga ginaayo sang mga petitioners ang Korte Suprema nga punggan anay ang pagpatuman sang layi samtang ginakwestyon sang mga ini ang constitutionality sang Negros Island Region Act.
Paathag ni Beloria, ang layi ang mapatuman lamang kun mapirmahan na sang presidente ang isa ka hagna kag may yara na sang implementing rules and regulations (IRRs).
Dugang pa sini nga nagakaigo lang ang tion sang pagfile sang petition bangud wala pa sang na issue nga IRRs para sa nasambit nga layi.
Nakadepende na sa Korte Suprema kun mangin madinalag-on ang ginfile nga petition batok sa pagpatuman sang Negros Island Region Act.
