Aminado ang Human Rights Lawyer nga parehas lamang ang linyada sang mga pamangkot sang Senate Hearing angot sa extrajudicial killings sang war on drugs kaangay sa Congressional hearings.
Sa interview sang Bombo Radyo Bacolod kay Atty. Cesar Beloria, separado nga chamber sang Congress ang Senado kag sila ang may otoridad nga makapatigayon sang imbestigasyon in aid of legislation apisar nga may kaangay na nga imbestigasyon sa House of Representative.
Ginalantaw ni Beloria nga palarehas lamang ang dalagan sang mga pamangkot kag kaangay man ang mga resource persons magluwas kay former President Rodrigo Duterte.
Ginalauman na sang Human Rights Lawyer nga mangin focus ang imbestigasyon sa drug war killings nga ginapahayag ginsunod sa modelo sang Davao City sang alkalde pa ang anay Presidente.
Nagapati si Beloria nga ini ang indi na pag-ideny ni Duterte bangod ini ang hayagan man nila nga gina-ako.
Ginalantaw man sini nga tindugan ni Senator Ronald “Bato” dela Rosa nga epektibo ang war on drugs model para sa makabig iron hand approach sa pagtapna sang problema sa illegal nga droga.
Apang ang mahimo nga ipanginwala sang mga ini amo ang tuhoy sa extrajudicial killings ukon ang pagpatay nga wala naglabay sa judicial process.
Dugang pa sang Human Rights Lawyer nga wala sang death penalty sa Pilipinas.
Nagapati ini nga sa Senate hearing, magapresentar ang kampo ni Duterte sang mga facts kag ebidensya nga magapamatuod nga ligetimate ang mga anti-drug operations.
Samtang indi kaangay sa Kamara nga tuman ka agresibo, nagapati si Beloria nga mangin kalmado ang Senado.
Nagapati man ini nga nagakadapat si Senator Koko Pimentel bilang presiding chairman samtang pipila lamang ang balantayan nga Senador nga magabuya sang mainit nga pamangkot kaangay ni Senator Risa Hontiveros.
