Aminado ang human rights lawyer nga apisar part 2 na sang Albee vs Bing sa 2025 Midterm Elections, madamo gihapon sang mga balantayan.
Sa interview sang Bombo Radyo Bacolod kay Atty Ceasar Beloria, wala na nakibot ang mga political observers sa natabo nga switching sa Team Asenso sa tunga nanday Bacolod City Mayor Alfredo “Albee” Benitez kag Congressman Greg Gasataya.
Apang aminado ini nga madamo sa mga ordinaryo nga pumuluyo ang nakibot sa desisyon.
Suno diri, bangod malawig nga nagserbe bilang alkalde si former Mayor Evelio “Bing” Leonardia, ang panawagan sadto ni Benitez nga pagbag-o ang nag-engganyo sa madamo nga testingan ang lain naman nga pamunuan.
Apang sa palaabuton nga eleksyon, ginalantaw ni Beloria nga mangin diskumpyado si Benitez bangod may iban nga magapinsar nga nagtilaw lang ini sa pwesto kag wala paman napatuman gid ang mga promisa.
Ginalantaw sini nga nadulaan na ang iban sang ekspektasyon bangod ini ang nagbiya sa pwesto agud magpapili sa pagka-konsehal sa rasun nga madamo pa ini sang madugang nga proyekto, samtang ginbilinan naman sini sang dako nga kautangan ang ciudad.
Ang dako naman nga bentaha para kay Leonardia amo ang malawig sini nga pagserbisyo bilang alkalde, bangod nakita na sang mga pumuluyo ang iya ikasarang kag hinimuan.
Sa pihak sini, ang dako naman nga bentaha ni Benitez kag Leonardia amo ang campaign resources.
Apang ginalantaw man ni Beloria nga malimitahan pa ang boto ni Benitez bangod indi tanan nga supporters ni Gasataya ang magaboto kay Benitez.
Aminado ini nga may mga raw supporters ang duha ka magkasumpong sa pagka-Kongresista, kag ang pinakadako nga makadesisyon sa magadaog amo ang mga swing voters.
