May dako nga epekto para sa mga local rice farmers ang pagpatuman sang P20 per kilo rice program.
Sa interview sang Bombo Radyo Bacolod kay Beltran Villanueva, rice vendor sa Burgos Public Market, maayo para sa konsumedor ang pagbaligya sang P20 kada kilo nga bugas.
Apang ini ang nagapatay sa mga mangunguma.
Ini bangod sa pagbaligya sang gobyerno sa manubo nga presyo nagtinguha man nga makacompete ang mga rice millers.
Apang agud mapanubo ang ila presyo, ginabakal sa tuman ka barato nga presyo ang mga humay gikan sa mangunguma.
Suno kay Villanueva antes ang pagpatuman sang P20 kada kilo nga bugas, ginabakal pa sa P19 tubtob P23 ang pamakal sang humay.
Apang sang nasuguran ang programa, nagapanaog na sa P12 tubtob P13 ang pamakal sa ila.
Halimbawa sini nga sa 100 ka kaban nga maximum nga patubas sa isa ka ektarya, 20 porsyento ang share sang harvester.
Samtang sa 80 ka kaban nga mabilin, ini ang buhinanan pa sang gasto sa hauling kag bayad sa mga tawo kun sa diin kapin P40,000 na lamang ang mahimo nga malimpyo nga kita, ukon mas manubo pa.
Sa pihak sini, P40,000 tuttob P45,000 naman ang magasto sa pagtanom sa kada ektarya nga duta kalakip na ang mga abono kag hilo.
Suno kay Beltran, kun magapadayun ang kaangay nga presyuhanay, ginapaminsar sini nga magtanom na lamang sang kalabasa.
