Padayun nga ginamonitor sang Negros Occidental Provincial Health Office sa health condition sang mga evacuees tuga sang pag-alburuto sang Bulkan Kanlaon, partikular na ang mga kabataan.
Sa interview sang Bombo Radyo Bacolod kay Negros Occidental Provincial Administrator Atty. Rayfrando Diaz, kalabanan sa mga pamalatian sang kabataan amo ang ubo, sip-on, hilanat kag lupot nga mahimo epekto sang klima.
Ang Provincial Health Office ang nagpadala na sang dugang nga hygiene kits kaina sang aga, kag sila ang magapadayun sa pagbulig depende sa kinahanglan sang mga evacuees.
Ang Provincial Government ang nagapadala man sang 500 ka 5 liters container sang mainom nga tubig gikan sa ciudad sang Bacolod.
Suno kay Diaz ang tubig sa evacuation site ang maisog sa chlorine kag ini ang indi makaya sang tiyan sang kabataan gani iban ang ginlupot.
Ginpadal-an naman sang tig-8 ka portalets ang apat ka evacuation sites ukon kabug-usan nga 32 ka portalets.
Gin-una sang mga ini ang mga evacuation centers nga may masobra isa ka libo nga evacuees bangod sila ang mas nagagutok sa CR.
Ginpadulungan naman sang siphoning service ang pila ka evacuation sites nga may problema sa nagabara nga CR.
May gin-augment naman nga 45 ka dugang nga personnel gikan sa Provincial Social Welfare and Development Office sa mga evacuation sites sa banwa sang La Castellana.
Suno kay Diaz ang nga target amo ang ma-address ang hygiene, nutrisyon kag hydration sang mga evacuees paagi sa pag-imprubar sang health programs.
