Gin-athag sang provincial administrator sang Negros Occidental nga ang Teresita Lopez Jalandoni Provincial Hospital pa lang sa ciudad sang Silay ang puno samtang madamo pa sang nabilin nga kapasidad ang iban nga mga ospital kaangay sang Cadiz District Hospital.
Ginpasiguro ni Atty. Rayfrando Diaz nga sa mga magalain ang pamatyag kag may mga sintomas, may-ara pa sang ospital nga sarang magamit ang probinsya.
Ginaathag man sini nga kalabanan sang mga nagpositibo sa COVID-19 ang yara sa EB Magalona healing center bangod indi naman sang mga ini kinahanglan nga dal-on sa ospital.
Samtang, magluwas naman sa tatlo ka mga doktor nga nagpositibo sa Teresita Jalandoni Provincial Hospital, ang iban nga mga medical personnel sang ospital ang nagnegatibo sa test.
Kahapon ginapaidalom naman sa reswab ang mga nagpositibo sa virus.
Kun makagwa naman ang resulta sang tanan nga ginswab sa ospital, sarang na liwat ini nga makabaton sang pasyente.
Ginklaro man ni Diaz nga willing mag-atender sang mga pasyente ang mga health care workers COVID patient man ukon non-COVID patient.
May ginabutang naman nga magascreening sa mga pasyente agud ng magpamangkot sang mga personal nga impormasyon kaangay sang travel history kun wala naman sang ginabatyag nga sintomas.
Ang mga emergency cases naman kaangay sang mga manugbata na ang indi dapat ginahold kag ginapangitaan pa sang swab result antes atendiron.
