Luyag sang Office of the Prosecutor sang International Criminal Court (ICC) nga umpisahan ang trial sa kaso ni former President Rodrigo Duterte sa Nobyembre 30, 2026.
Sa 17 ka panid nga obserbasyon nga ginsumiter antes ang pinakauna nga status conference sa kaso ni ex-Pres Duterte, ginpahayag ni Mandiaye Niang nga ginalauman nila nga makumpleto ang tanan nga kinahanglanon sa pre-trial steps antes matapos ang bulan sang Septyembre subong nga tuig.
Apang gintumod sang bag-o nga abogado sang anay Presidente nga si Atty. Peter Haynes nga wala nagakaangay nga magtalana sang petsa para sa pagsugod sang trial bangud sang ‘unresolved factors’.
Angot sini, ginpahayag niya nga plano nila nga i-revisit ang isyu sa fitness to stand trial sang iya kliyente.
Dugang pa sang British barrister nga kun indi pa handa nga mag-atubang sa trial si ex-Pres. Duterte, magakinahanglan ang defense team sang bastante nga tion agud makapreparar sa kaso.
Samtang, naghingyo sang bag-o nga fitness review sa International Criminal Court ang bag-o nga abogado ni former President Rodrigo Duterte.
Sa gin-file ni Peter Haynes, ginhingyo niya sa korte nga repasuhon ang ikaayong lawas sang anay presidente agud makatambong ini sa mga hearing.
Makita niya mismo nga padayon nga nagaluya ang ikaayong lawas sang anay presidente.
Sa tion nga ang anay presidente makita nga mabakod para sa hearing, importante nga hatagan sila sang bastante nga tion sa pagpreparar.
Madumduman nga una na nga ginbasura sang ICC ang motion sang bahin ni Duterte kun sa diin gindeklara ang mga ini nga mentally and physically fit agud atubangon ang pre-trial proceedings.
Sa ginpagwa nga desisyon sang Pebrero 13, ginpahayag sang Pre-Trial Chamber nga may bastante nga kusog ang anay presidente agud makatambong sa hearings.
Nahibaluan nga masobra na isa ka tuig nga preso si Duterte sa ICC, kun sa diin gina-atubang sini ang kaso nga crimes against humanity bangud sang iya maduguon nga kampanya sa iligal nga droga.
