Nagpagwa sang update ang International Criminal Court (ICC) natuhoy sa kahimtangan ni former President Rodrigo Duterte samtang naka-detain ini sa The Hague, Netherlands.
Santo sa ICC Registry, si Duterte ang ginakabig nga “elderly detained person” gani ini ang ginpaidalom sa ‘continuous cell monitoring’.
Suno sa ICC, sa mga tumalagsahon nga tion nga nagakatumba si Duterte, gilayon man nga naga-assist ang mga custody staff agud buligan ini kag gilayon man ang pagpatigayon sang medikal nga eksaminasyon.
Dugang pa, ginpasiguro man sang ICC nga ginhimo nila ang tanan nga nagakaigo nga adjustments sa selda ni Duterte agud masiguro ang seguridad sini.
Apang, wala ginpakigbahin ang detalye sang iya mga balatian bangud sa medical confidentiality.
Si Duterte, nga naga-edad 81-anyos, ang nagapangatubang sang mga kaso nga crimes against humanity may kaangtanan sa war on drugs kag ginaalegar Davao Death Squad.
