Ginpasalamatan sang International Criminal Court sa The Hague ang mga otoridad sa Pilipinas matapos nabutang sa ila kustodiya si former President Rodrigo Duterte matapos siya ang naaresto sa Manila may kaangtanan sa mga pagpamatay nga naangot sa war on drugs sang iya administrasyon.
Sa isa ka situation post nga nakapost sa website sini, ginpahayag sang ICC nga isa ka hearing ang nakaschedule para sa initial appearance ni Duterte sa tribunal.
Suno diri, sa hearing, igakumpirmar sang Chamber ang identity sang suspetsado kag ang lengwahe nga masarangan ni Duterte agud makasunod sa proceedings.
Sa post, ginpasalamatan ni ICC Registrar Osvaldo Zavala Giler ang mga otoridad sa Pilipinas bangud sa ila commitment sa pag-uphold sang international accountability mechanisms kag ang mga otoridad sa Host State sang the Netherlands sa kooperasyon kag suporta.
Ginpahayag ni ICC spokesperson Fadi El Abdallah nga yara kustodiya sang International Criminal Court kag yara sa sulod sang detention facility sa Scheveningen, The Hague si former President Rodrigo Duterte.
Suno sa tagpamaba, si Duterte ang nagpaidalum sa mga medical check-up bilang kabahin sang standard procedure.
Suno diri, kun mag-abot ang isa ka suspect sa ICC custody, ang korte, bilang isa ka standard practice, ang nagahimo sang mga tikang agud maprotektahan ang ikaayong lawas sang suspetsado.
Suno sa iya, igaanunsyar sang korte ang schedule sang initial appearance ni Duterte.
Ang anay Presidente ang ginalauman nga magpabilin sa ICC Detention Center, nga nalocate sa sulod sang prison facility.
