Nagpaandam si International Criminal Court Assistant to Counsel Atty. Kristina Conti nga mahimo makaapekto sa posibilidad sang paghilway kay Presidente Rodrigo Duterte ang nangin pahayag ni Senate President Alan Peter Cayetano nga nagapakigbato sa war on drugs sang nakaligad nga administrasyon.
Suno kay Conti, ginpakita sang pahayag ni Cayetano nga nagapabilin nga mabaskog ang impluwensya kag koneksiyon ni Duterte sa Pilipinas.
Ginpahayag sini nga posible paminsaron sang ICC nga may mga tawo nga handa magbulig kay Duterte pananglitan makabalik ini sa pungsod, gani mahimo mangin rason ini agud indi tugutan nga makagwa si Duterte sa detention samtang nagapadayon ang imbestigasyon.
Madumduman nga ginpahayag ni Cayetano sa isa ka Facebook livestream nga ang war on drugs ni Duterte amo isa ka “pro-life” kag “human rights” campaign nga may katuyuan nga proteksyunana ang komunidad batok sa ilegal nga droga.
