Gin-aprubahan sang International Criminal Court (ICC) Trial Chamber III ang pagpa-freeze sang kwarta nga nakumpiskar sadto kay former President Rodrigo Roa Duterte matapos ini maaresto kag gindala sa kustodiya sang international tribunal sang Marso 2025.
Ini matapos ginhingyo sang prosekusyon nga ma-access ang iya mga gamit kag i-freeze ang kwarta sang anay presidente.
Base sa dokumento nga ginpagwa sang ICC sang Biyernes, Hunyo 27, ang mosyon sang prosekusyon ang ginpaboran sang korte.
Nauna na nga ginkwestyon sang kampo ni Duterte ang nasambit nga tikang sang Trial Chamber III.
Suno sa depensa, indi na kinahanglan pa sang prosekusyon nga maghimo sang mosyon bangud yara naman sa kustodiya sang ICC Registry ang nasambit nga kwarta.
Dugang pa, wala man ini sang mangin epekto sa mismo nga trial.
Apang, wala naman ginbuyagyag sang ICC ang balor sang nakumpiskar nga kwarta kay Duterte.
