Nagpagwa sang unanimous decision ang International Criminal Court (ICC) Trial Chamber III nahanungod sa padayon nga pag-detain kay anay President Rodrigo Duterte.
Nagdesisyon ang Chamber nga magapabilin nga naka-detain ang anay presidente sa the Hague, sa Netherlands.
Ini kasunod sang ikatatlo nga status conference sa diin nakitaan sang Chamber nga may posibilidad nga mag-abscond ukon magpalagyo si Duterte kasubong man sa posible nga pag-obstruct sa imbestigasyon.
Bangud sa pag-disclose sang prosekusyon sang listahan sang mga testigo kag ang posible nga kaundan sang ila mga testimoniya, nagapati ang Chamber nga mas nagtaas ang tsansa nga impluwensyahan sang kampo ni Duterte ang mga testigo.
Wala pa nakadesisyon ang Chamber natuhoy sa kondisyon sang ikaayong lawas ni Duterte base sa gin-request sang depensa nga dugang nga eksaminasyon agud matumod ang diagnosis sini.
Apang, nagpahayag ang Chamber nga wala nag-provide sang bag-o nga information ang mga abogado ni Duterte nga makabulig nahanungod sa iya nga detention.
Nagapangatubang si Duterte sang kaso nga crimes againts humanity angot sa war on drugs nga ginpatuman sa iya nga tion bilang Presidente kag Davao City mayor.
Natalana naman nga mag-umpisa ang trial sa Nobyembre 30.
