Luyag sang France nga mangin greenest kag most sustainable olympics ang 2024 Paris Olympics gani ila nga gin-integrate ang mga iconic landmark sa pungsod.
Sa interview sang Bombo Radyo Bacolod kay Dinah Ventanilla Sauve, derekta sa France, halos duha na ka semana sa pungod ang mga atleta para sa pre-training antes paman ang pag-umpisa sang pahampang nga nakaschedule halin Hulyo 26 tubtob Agosto 11.
Tuman man ang pag-estrikto sa seguridad ilabi na nga first time sa maragtas nga indi sa stadium ang opening ceremony kundi sa iconic Seine River.
Suno kay Sauve, ang parade of athletes ang patigayunon pinaagi sa mga tourist boats, samtang sa river banks naman ang mga tumalan-aw.
Padayun man ang pagpaninlo sa Seine River kag mismo si Paris Mayor Anne Hidalgo ang nagpasalig nga siya ang una nga magalangoy sa suba agud ipakita nga ini ang safe kag sarang magamit sa triathlon swimming.
Ginalantaw nga magdangat sa 15 million ang turista nga maga-abot sa pungsod, samtang ginalantaw nga katunga nalang sang 12 million population sa France ang mabilin bangod ang mga Parisians ang amat-amat na nga nagahalin sa lugar sa kahangawa sang overpopulation.
Ang mga magaserbe nga venue ang ginsarado naman samtang sa pagsugod sang Olympics dumilian naman ang pagsulod sang mga private vehicles magluwas sa mga salakyan sang mga delegado nga ginpahanugutan sang Olymic Committee.
Apisar nga gintinguhaan nga mapabilin nga greenest ang Olympic village, ang mga delegasyon ang nagpangaman naman pinaagi sa pagdala sang airconditioning units bangod sa kahangawa sang epekto sang heat wave sa performance sang mga atleta.
Ini ang maragtason man nga hosting sang France bangod sila ang ulihi nga nakahost sang event sang 1924, isa ka gatos ka tuig na ang nakaligad.
