Ginhamtangan sang concrete barriers ang idalom sang Magsaysay Flyover sa ciudad sang Bacolod.
Sa interview sang Bombo Radyo Bacolod kay Bacolod Traffic Authority Office Deputy Head Jose Antonio “Jojo” Robello, ginrequest sang Department of Public Works and Highways nga mahulam ang concrete bariers sang Bacolod Transport and Traffic Management Department.
Ini agud masirad-an ang idalom sang Magsaysay flyover nga ginahimo na nga parking area.
Aminado si Robello nga ang tikang ang pabor man sa ila bangod masami man sila nga nagabalik-balik sa area agud magsaway sa mga nagapark nga traditional jeepneys, taxi, e-bike, pribado nga salakyan kag kun kis-a ginahamtangan sang mga kasapatan.
Paathag sini nga indi gid man pwede nga magpark sa nasambitan nga area.
Ang tikang ang ila man patigayunon sa Bata Flyover nga may kaangay man nga problema.
Sa pihak nga bahin, ginhamtangan naman sang mga tubo ang sidewalk sa idalom sang overpass.
Ini bangod madamo ang nagasaka sa sidewalk agud magpark.
Ini ang kaangay nga ginahimo na nga paradahan sang iban nga mga salakyan nga nagahulat sang pasahero.
Paathag ni Robello nga kun magsaka ang salakyan sa sidewalk, ang mga pedestrian ang mapilitan nga maglabay sa highway bangod sila ang wala na sang alagyan, kag ang mga ini ang mahimo mabungguan sang mga salakyan.
Gani, ginbutangan nila sang tubo ang sidewalk agud indi na makataklas ang mga salakyan.
