Padayon pa ang imbestigasyon sa pagtumod sa identity sang lalaki nga nasapwan sa kampo sang tubo sa Hda. Bernabe, Brgy. Salvacion, Murcia, Negros Occidental.
Madumduman nga nasapwan ang bangkay sang nagaarado sa kampo.
Ang bangkay sang lalaki nakasuksok lamang sang underwear samtang yara sa 5-foot-7 ang iya kataason.
Nasapwan ang biktima nga ang kamot sini yara sa likod apang wala man nakahigot.
Gin-alegar hungod nga ginlubong sa kampo ang biktima kag ini nasapwan 20 metros ang kalayuon nagikan sa access road.
Sa interview sang Bombo Radyo Bacolod kay Police Major Sherwin Fernandez, Chief of Police sang Murcia Municipal Police Station, may duha na ka pamilya nga nagpadulong sa ila estasyon agud lantawon kun ila himata ang biktima.
Negatibo ang una nga pamilya nga ila himata ang lalaki apang ang ikaduha naman nga pamilya nga gikan sa ciudad sang Bacolod ang liwat nga mabalik subong nga adlaw kaupod ang iban pa gid nila nga pamilya agud matumod kun ila gid man himata ang nasapwan nga bangkay sang lalaki.
