Wala pa gihapon natumod ang matuod nga identity sang barker ukon nagapasaka sang pasahero sa jeep nga ginpatay sang nagaisahanon nga gunman samtang nagahampang ini sang computer sa Purok Langis, Barangay Banago, ciudad sang Bacolod kagab-i.
Sa interview sang Bombo Radyo sa station commander sang Bacolod Police Station 3 nga si Police Capt. Armilyn Vargas, nagpadulong kaina ang imbestigador sa Barangay Mambulac, Silay City bangud nagagwa ang impormasyon nga tumandok gid ini sang Mambulac.
Kagab-i, may nagpahibalo sa ila nga residente ini sang Mambulok, Barangay 10 apang may nakasugid man nga taga-Mambulac gid ang biktima.
May nagpadala naman sang mensahe nga Bryan Garrido ang ngalan sang biktima apang subject for confirmation pa ini.
Suno kay Vargas, ang biktima ang kilala lamang sang residente sa lugar nga si Bryan.
Siya ang nagarenta sang puluy-an sa Purok Lubi, Barangay 3 ukon sa tabok sang taytay sa Purok Langis.
Wala man ini sang pamilya kag mahimo nga nagasaylo-saylo sang iya ginadayunan bangud una nga naggwa nga nagapauli ini sa Purok Serisa, Barangay 3 apang sa bulig sang Bacolod Police Station 2, natumod nga sa Purok Lubi ini nagadayon.
Nagagwa sa imbestigasyon nga routine na ni Bryan ang paghampang sang computer sa nasambit nga pisonet shop kun magpauli nagikan sa barking sa atubang sang City Mall Mandalagan gani natultulan sang suspetsado.
