Narescue na kag igapaidalom sa operasyon ang aspin nga may igo sang indian target nga nasapwan sa Prk Isla, Brgy Villamonte, Bacolod City.
Ang ido ang ginkilala nga si “Milo.”
Sa interview sang Bombo Radyo Bacolod kay Jerrold Abraham Go, registered nurse kag nagaserbe nga Purok President sa Prk Isla kasubong man Barangay Administrator, siya amo ang nagpost tuhoy sa kahimtangan sang ido, agud makita sang mga animal advocate groups kag mabuligan.
Suno diri, yara siya sa Barangay Hall sang nagdangop ang iya hinablos nga nagapangita sang veterinarian.
Sang gin-usisa, didto sini nahibaluan nga nakita nga may igo sang Indian Target sa bahin sang gusok ang ido sang ila kaingod.
Suno diri, ang ido ang nakita nga nagikan sa wayang ukon masiot nga bahin sang Purok Isla, nga may mga katubuhan, kag ginalantaw nga didto natabo ang pagpang-Indian target.
Wala pa nila nahibaluan kun sin-o ang may kahimuan sang pagpanakit sang sapat.
Panawagan sini sa mahimo nakawitness nga magdangop sa Barangay.
Ini bangod sila nga mga Barangay official ang wala lamang naga-ulikid sa mga pumuluyo sang Barangay kasubong man sa mga kasapatan.
Para kay Go, kun ano ang kapintas nga ginpakita sang nag-Indian target kay Milo, amo man ini ka pintas bisan sa tawo.
Ginapasalamat na lamang sini nga sang iya ginpost sa social media ang kahimtangan sang ido, may nagpalab-ot sa BACH Project kag ini ang narescue.
