Ginhanduraw ang ika-164 nga kaadlawan ni Gat Dr. Jose Rizal sa Rizal Elementary School sa Bacolod City kaina sang aga.
Sa interview sang Bombo Radyo Bacolod kay Dr. Pedro Crispe Jr., principal sang Rizal Elementary School, bangod nakapangalan sa National Hero ang eskwelahan, nagakadapat lamang nga ila ini nga dumdumon.
Mensahe sini nga dapat makilala si Gat Dr Jose Rizal kag ini ang mangin inspirasyon sang pamatan-on.
Sila ang nagpatigayon sang flag raising kag naghalad sang bulak sa ginpatigayon nga programa nga nag-umpisa alas-7:30 sang aga.
Matapos ang programa, sila ang nagpatigayon man sang blessings sa 22 ka newly-renovated classrooms, nga ginpondohan sang Bacolod City Government sa balor nga P9.3 million.
Ang aktibidad ang gintambungan man sang pila ka opisyales sang ciudad.
Nagserbe naman nga representative ni outgoing Bacolod City Mayor kag Congressman-elect Alfredo “Albee” Benitez sa nasambitan nga aktibidad si Councilor Jude Thadeus “Thaddy” Sayson.
Sa speech ni Sayson, indi lamang dapat death anniversary ni Gat Dr. Jose Rizal sa Disyembre 30 ang handurawon kundi kasubong man ang iya kaadlawan.
Aminado ini nga ginadumdom ang kamatayon sang baganihan, nga may dako nga kontribusyon sa pag-angkon sang kahilwayan sang Pilipinas.
Apang para sa konsehal, mas dapat nga ginasaulog ang birth celebration sangsa death celebration.
