Pagpanumbalik sang pagkabaganihan ni former senator Benigno Aquino Jr. kag pagpangagda nga ang tanan sarang mangin baganihan man ang mensahe nga luyag ipadangat sang Federation of the Urban Poor (FED UP) kadungan sang selebrasyon sang Ninoy Aquino Day subong nga adlaw, Agosto 21, 2023.
Kaina sang aga, nagtipon sa Ninoy Aquino monument sa Araneta Street , Bacolod City ang kapin 80 ka partisipante.
Nagsuksok sang tshirt nga yellow kag naghigot sang yellow nga ribbon sa natuo nga kamot ang mga nagpartisipar kasubong man nga naghatag sila sang bulak sa monumento ni Aquino.
Sa interview sang Bombo Radyo kay Joy Jarabelo, presidente sang FED UP, ila ginpanumbalikan ang tanan nga mensahe ni Aquino nga nakasentro sa paghalad sini sang iya kabuhi kag sakripisyo para sa matarong, husto kag paghatag sang bili sa pagka-Pilipino sang kada isa.
40th year death anniversary Ninoy Aquino
Suno diri, si Ninoy isa ka maisog nga tawo, nangisog ini nga nagpanindugan sa insakto kag pagsikway sa sala.
Dugang pa ni Jarabelo, wala gingamit ni Ninoy ang iya kaisog para sa iya kaugalingon apang ini ang iya ginhatag para sa Pilipino.
Nanawagan man ini sa gobyerno sa pagpanghagkat sang pungsod sa pagsaka sang presyo sang bugas, gasolina kag balaklon.
Kasubong man ang pagdako sang utang sang Pilipinas nga indi man makita kun sa diin ginagamit ang kwarta nga gina-utang.
Pahayag ni Jarabelo, luyag sini nga ibalik ang pagpangisog ni Ninoy nga manawagan kag magsaway sa sala nga trabaho sang gobyerno.
