Nangin matawhay ang ikaanum nga adlaw sang filing sang Certificate of Candidacy sang mga political aspirants nga magapapili sa 2025 Midterm Elections sa probinsya sang Negros Occidental.
Sa interview sang Bombo Radyo Bacolod kay Negros Occidental Provincial Election Supervisor Atty. Ian Lee Ananoria, nangin matawhay ang sitwasyon sang COC filing sa probinsya apisar nga madamo sang mga supporters ang nag-upod sa mga political aspirants nga nagfile.
Kahapon, tatlo ang nag-file sang Certificate of Candidacy sa pagka-congressman samtang apat naman sa pagka-board member sang Negros Occidental.
Sa First District, nag-file sang COC agud magbalik bilang district representative si anay Congressman Jules Ledesma.
Nag-file man sanday Salvador Benedicto Mayor Marxlen dela Cruz kag Incumbent Board Member Araceli Somosa nga pareho magapapili para sa Sangguniang Panlalawigan.
Samtang, sa Third District, nagasundanay nga nag-file sang COC sanday Victorias City Mayor Javier Miguel “Javi” Benitez sa pagka-congressman kag sa pagka-Board Member sanday incumbent Board Member Andrew Montelibano kag Talisay City Councilor Rolin Albert Meliton.
Si Vice-Governor Jeffrey Ferrer ang nag-file man para sa pagpanumbalik sini bilang Fourth District Congressman.
Nagtambong sa ikaanom nga adlaw sang filing sang COC si Governor Eugenio Jose “Bong” Lacson kag ang mga supporters sang tagsa-tagsa ka mga kandidato.
Suno kay Ananoria, wala sang narecord nga may nagfile nga political aspirants’ para sa substitution.
