Nakilala na ang ikaanom nga napatay sa pagkasunog sang Java Pension House.
Mismo ang fire marshal sang Bacolod ang nagkumpirmar nga ang napatay amo si Arniel Bajinting nga residente sang Cebu.
Sa interview sang Bombo Radyo Bacolod kay Fire Chief Inspector Publio Ploteña, fire marshal sang Bacolod, ginpahayag sini nga ang anay upod sa trabaho ni Bajinting ang nag-identify sa bangkay sini.
Positibo man ini nga ginkilala sang ulihi nga persona nga iya gin-suplayan.
Nahibaluan nga si Bajenting ang isa ka freelance supplier.
Nahibaluan nga anom ka mga persona ang nagkalamatay kadungan sang sunog kahapon sang kaagahon.
Ini ang ginalakipan sang tag-iya nga si Christopher Java, 12-anyos nga bata nga si Miguel, iloy ni Christopher nga si Magdalena kag yaya nga si Ronalyn Dacalio sang Barangay Abuanan, Bago City.
Magluwas sa ila, patay man ang duty sa front desk nga si Arnold Filomeno.
Nagdangat naman sa apat ang pilason kalakip na ang isa ka Australian national nga amo nalang ang nagaisahanon nga nagapabilin subong sa ospital samtang yara na sa luwas nga kahimtangan ang tatlo.
P5 million naman ang balor sang halit nga gintuga sang sunog sa Pension House.
Una na nga ginpahayag ni Ploteña nga may yara na sila sang person of interest may kaangtanan sa suspetsado ukon mga suspetsado nga nagsunog sa Java Pension House.
Ini matapos nga makuhaan sang video ang mga suspetsado nga ginaalegar naghaboy sang ginsindihan nga helmet sa mga motorsiklo nga nakapark sa ground floor sang pension house.
