Nag-abot na sa ciudad sang Bacolod ang ikaduha nga batch sang mga police personnel nga gin-augment sang Police Regional Office 6 para sa seguridad sang MassKara Festival.
Suno kay Police Lt. Col. Ronnie Brillo, commander sang Bacolod City Mobile Force Company, 566 tanan ang kabug-usan nga numero sang mga police personnel nga nagabug-os sang second batch nga gin-augment sa ciudad.
Ini ang ginalakipan sang 32 nagikan sa Aklan Police Provincial Office; 67 nagikan sa Antique Police Provincial Office; 162 nagikan sa Capiz Police Provincial Office; 18 nagikan sa Guimaras Police Provincial Office; 189 nagikan sa Iloilo Police Provincial Office; 56 nagikan sa Iloilo City Police Office; duha nagikan sa Regional Holding and Accounting Section kag 40 naman ang nagikan sa Regional Mobile Force Battalion.
Suno kay Brillo, may yara sang 16 ka police commissioned officers kag 550 ka police non-commissioned officers nga nalakip sa augmentation.
May yara man sang mga women police personnel nga nakaupod sa augmentation.
Suno kay Brillo, ang mga police personnel ang igadeploy sa anom ka festival sites kag magaduty sa mga lugar nga wala pa sang pulis nga nagabantay.
Ang una nga batch sang police personnel nga gin-augment sa ciudad ang nagikan sa Negros Occidental Police Provincial Office.
Sa kabug-usan, nagadangat sa 1,100 ka mga police personnel ang gin-augment sa pwersa sang Bacolod City Police Office subong nga MassKara Festival.
