Ginalauman nga matapos na subong nga adlaw ang pagpanagtag sang Bacolod City government sang food packs sa mga pumuluyo kadungan sang modified enhanced community quarantine sa ciudad nga magatakop sa Setyembre 30.
Una diri, ginkompirmar sang pinuno sang Department of Social Services and Development (DSSD) nga nakahatag na sila sang second batch sang foodpacks humalin kahapon sa numbered kag named barangays sa syudad sang Bacolod.
Sa interview sang Bombo Radyo kay Pacita Tero, masobra na sa 40 mil ka mga foodpacks ang natipon sang DSSD agud ipanagtag sa mga pumuluyo, humalin sang 38 mil ka foodpacks sang tinalikdan.
Suno kay Tero, ginhatag nila ang mga foodpacks sa barangay kag ang barangay na ang magaschedule sa pagpanagtag sa mga benepisyaryo sa mga kapurukan.
Ang foodpacks ang ginalakipan sang pito ka kilo nga bugas kag walo ka canned goods kun wala sang noodles apang lima lang ka canned goods kun may yara sang noodles.
Kadungan sini, gin-athag man ni Tero nga indi lang transport sector members ang ginahatagan sang foodpacks kundi ang tanan nga yara sa poverty threshold ukon 10, 000 pesos ang income kada bulan panubo.
Suno kay Tero, nagadangat sa 10 mil ang public transport drivers nga apektado sang Modified Enhanced Community (MECQ).
Nakadepende naman sa purok chairman ang pagtumod sa mga apektado agud matalalapod ang mga nagakinahanglan.
Nagpanawagan man si Tero sa mga may ikasarang nga magbakal sang pagkaon ukon nakakuha sang ayuda sa iban nga ahensya sang gobyerno nga magpaiway na lamang agud mahatagan gid ang nagakinahanglan.
