Ginahanda na sang city government sang Bacolod ang ikaduha nga hugnat sang foodpacks nga ihatag sa mga pumuluyo samtang yara pa sa idalom sang modified enhanced community quarantine ang Bacolod.
Sa interview sang Bombo Radyo kay Department of Social Services and Development head Pacita Tero, madali nalang maubos ang 38 mil ka mga food packs nga ginsuguran panagtag sang Setyembre 11.
Bangud pito lang ka kilo ang bugas nga nalakip sa foodpacks, liwat naman sila nga manghatag sa Setyembre 21 kag maigo na ang unod sini tubtub Setyembre 30 nga amo man ang ulihi nga adlaw sang MECQ sa Bacolod.
Ginahulat naman lang sang ciudad ang cinco mil ka sako sang buas nga igadeliver sang NFA.
Sa karon, ang Barangay Tangub nalang ang ginabantayan ni Tero kun nakabaton na sila sang ayuda.
Nahibaluan nga gin-una sang city government ang numbered barangays antes ang named barangays.
Nagpanugyan man ini sa mga drivers nga indi residente sang ruta nga ginabiyahe-an nga magkuha sang certification halin sa presidente sang assosasyon agud mapakita sa barangay nga ginapulian nga miyembro siya sang transport group agud mahatagan sang ayuda.
Suno kay Tero, natalupangdan sang alkalde ang kinahanglanon sang public utility vehicle drivers gani sila ang ginhatagan sang prayoridad.
Aminado man si Tero nga magluwas sa foodpacks nga ginahatag sa mga PUJ drivers, madamo man nga mga jeep ang ginkuha agud nga maghatag sang libre nga sakay sa mga essential workers kag frontliners kun sa diin sila ang nagabaton sang tres mil pesos nga arkila kada adlaw.
