Ginbawian sang kabuhi ang ikaduha nga lalaki nga narescue sang mga otoridad nagikan sa livestock ship nga ginasakyan sang 39 ka mga Pinoy seaman nga naglugdang sa baybayon nga sakop sang Japan sang Miyerkules sang kaagahon.
Suno sa Japanese Coast Guard, ang lalaki ang nakit-an nga unconscious kaina sang aga, ginabanta 120 kilometros ukon 75 miles sa north-northwest sang Amami Oshima Island kag gilayon nga gindala sa ospital apang siya ang nagtaliwan.
Wala pa sang identity ang crew.
Suno sa Coast Guard, nagakulob ang lalaki sang ini ang ila nga nakit-an.
Naretrieve man sa pareho nga lugar ang isa ka life jacket kag isa ka patay nga baka.
Sa karon, padayon pa ang pagpangita sa 41 ka iban pa nga crew sang Gulf Livestock 1.
Ginalauman nga ang search operations ang maapektuhan sang nagapalapit nga Bagyo Haishen sini nga weekend.
Tatlo ka mga barko, apat ka eroplano kag duha ka divers ang nagapakigbahin sa search operations suno sa Coast Guard.
Madumduman nga malapit 6, 000 ka baka ang karga sang Gulf Livestock 1 nga nagikan sa Napier, New Zealand kag padulong ini sa Tangshan, China sang nagpadala ini sang distress call nagikan sa west sang Amami Oshima Island kadungan sang pagwaswas sang Bagyo Maysak.
Sang Miyerkules sang gab-i, narescue sang mga otoridad ang chief officer nga si Eduardo Sareno. 45-anyos kag tumandok sang Cebu.
