Naaresto kahapon, alas 3:00 sang hapon, ang ikaduha nga suspek nga nagpatay sa 51 anyos nga manunudlo nga si Tony Lazaga sang Binalbagan Catholic College sa Doma Street, Barangay San Pedro, Binalbagan sang kaagahon sang Agosto 16.
Sa amo man nga adlaw, nadakpan sang hapon ang isa sa tatlo ka suspek nga nagpatay sa manunudlo.
Ang suspetsado ang ginkilala nga si Johnrey Castino alyas Jansen, 19 anyos kag residente sa Purok Apitong, Barangay San Teodoro, Binalbagan.
Samtang, kahapon alas 3:00 sang hapon, natigayon nga naaresto ang isa pa gid ka suspek nga amo si John Paolo Fernandez, 21 anyos, sa Barangay Tinongan sa nabukid nga bahin sang banwa sang Isabela.
Sa interview sang Bombo Radyo kay Police Major Randy Babor, hepe sang Binalbagan Municipal Police Station, mismo ang pamilya ni Fernandez ang naghatag sang impormasyon kag nagkooperar agud matigayon nga maaresto ini.
Suno diri, si Fernandez nagpadulong sa Isabela sa kakilala sini.
Nagtinguha pa nga malagyo si Fernandez sang nakita sini ang pila ka kapulisan apang ini ang natigayon nga nadakpan.
Pahayag ni Babor, nag-ako mismo si Fernandez nga siya isa sa mga suspetsado apang wala sini gin-ako nga siya ang nagbuno.
Si Lazaga ang nag-agom sang 16 ka pilas sa pagpamuno.
Ginkumpirmar man ni Babor nga napasakaan na sang kaso ang una nga nadakpan nga si Castino sa kaso nga robbery with homicide.
