Pito na ka tower sa Yuhum Village ang ginbuksan para sa reservation sang mga Bacolodnon nga kwalipikado nga makakuha diri sang unit.
Suno kay City Councilor Vladimir Gonzales, chairperson sang committee on urban poor development and resettlements sa Sangguniang Panlungsod, 14 ka tower ang kabug-usan nga patindugon para sa Yuhum Village.
Suno kay Gonzales, ginbuksan na ang Tower 7 kag 8 bangud sold out na sa reservation ang nauna nga anom ka tower.
Ang kada tower ang may yara sang 163 units kag kun mapuno na ini, pagabuksan naman ang masunod nga building.
Ang kada tower ang may apat ka storeys kag 24 square meters ang size sang kada unit, nakatiles na ang comfort room, may kitchen counter apang ang awardee na ang magadecide kun paano sini ilay-out ukon butangan sang partition ang iya unit.
Sa karon, wala pa nafinalize kun may subsidy ang gobyerno sa mga makakuha sang units apang kun wala sang subsidy, 6.25 percent ang interest rate sa PAGIBIG Fund kada tuig, samtang mangin 1 percent nalang ang interest rate sang mga units sa Yuhum Village kun may yara sang subsidy nagikan sa gobyerno.
First come, first served ang basehan agud nga makakuha sang unit sa kada tower.
Sa karon, aprubado na ang construction sa tatlo ka site — ang sa Arao Relocation Site, Barangay Estefania, kag sa Barangay Banago nga amo ang ginaoffer sa karon sa mga nagapareserve kag may 2,000 units.
Suno kay Gonzales, target nga mapatindog ang una nga 10,000 units sa Bacolod sa sulod sang tatlo ka tuig bangud ang ciudad ang una nga ginpatindugan sini.
Ginalauman naman sini nga maka-identify sang dugang nga sites sa masunod nga binulan bangud target nga mabutang ang housing units sa nagkalain-lain nga bahin sang ciudad.
