Ginserbe sang Provincial Government sang Negros Occidental ang ikatlo nga notice to vacate sa 112 ka pamilya sa Brgy 39, Bacolod City.
Suno kay Provincial Legal Officer Alberto Nellas, Jr., sa ongoing nga pagserbe sang notices may yara sang willing to receive kag may yara man sang naga pamalibad sa pag baton sini.
Suno kay Nellas, bilang kabahin sang compliance sa 3-notice rule, ila padayon sa karon nga ginaserbe ang ikatlo nga notice to vacate.
Kasunod sini ila nga ginapaabot ang pag file sang probinsya sang ejectment case batuk sa 112 ka mga pamilya.
Ang duta nga ginatindugan sang balay sang 112 ka pamilya ang gina panag-iyahan sang pamilya Lizares nga dapat ibalik sang provincial government sa pamilya.
Nahibaluan nga sang 1954 nagdonate sang duta ang pamilya Lizares sa Negros Occidental High School para gamiton nga school garden.
Apang ang nasambit nga tinutuyo ang wala nasunod, gani sang 2012 nag file ang pamilya Lizares sang cancellation of Deed of Donation.
Ini ang ginpaboran sang korte sa decision nga ginpagwa sang 2021.
Apang may yara sang nadihon nga compromise agreement ang probinsya kag ang pamilya Lizares.
Nakasugtan nga ang duta nga napatindugan na sang mga building sang provincial kag national government ang maga pabilin na lamang sa gobyerno kag ang nabilin naman nga duta ang igabalik sa pamilya Lizares nga wala dapat sang informal settlers.
