Nagsungka na ang ikatatlo ukon nabilin nga suspetsado sa pagpatay kay Tony Lazaga, manunudlo sa Binalbagan Catholic College nga ginpatay sang Miyerkules sang kaagahon.
Madumduman nga una nga nadakpan ang 19 anyos nga si Johnrey Castino alyas Jansen, sang Miyerkules sang hapon bangod sa witness nga nakakilala sa iya samtang gintuad man sini ang duha pa ka kaupdanan.
Sunod nga nadakpan sang Huwebes sang hapon si John Paolo Fernandez, 21 anyos residente sa Purok Apitong, Barangay San Teodoro, Binalbagan.
Sa interview sang Bombo Radyo Bacolod kay Police Major Randy Babor, hepe sang Binalbagan Municipal Police Station, magkaupod sang nagpalagyo si Fernandez kag ang ikatatlo nga suspetsado nga si Jonathan Santilla, 22 anyos, residente sa Barangay San Jose, Binalbagan.
Sa pagtrace sang mga kapulisan natumod nga nagtabok ang duha ka suspect sa banwa sang Isabela.
Una nga nadakop si Fernandez sa Barangay Tinongan, Isabela samtang si Santilla ang nagpanago naman sa mga himata sini sa Barangau Inolingan sa kaiping nga Barangay.
Una na nga nagpadala sang feeler si Santilla nga siya ang magasungka, gani wala na nagpursegi pa ang mga kapulisan sa pag-ayam sa iya ilabi na nga nagpasalig naman si Moises Padilla Vice Mayor Ian Villaflor nga nagdangop na sa iya ang suspetsado kag igasurrender man sini sa kapulisan.
Sa karun ang duha pa lamang ka mga nauna nga nadakpan ang nakapagwa sang ila nga mga statements, apang parehas man nga nagapanginwala sa ila nga derekta nga kaangtanan sa pagbuno.
Nafile naman ang kaso nga robbery with homecide kanday Castino kag Fernandez samtang igalagas man sang Binalbagan Municipal Police Station ang kaso batok kay Santilla.
Sa impormasyon nga nabatun sang kapulisan, may grupo ang mga suspetsado bangod si Castino ang makapila naman naangot sa mga kinagamo sang siya ang menor de edad pa lamang samtang may impormasyon man nga sila ang may link sa mga identified drug personalities.
Bangod sini, nagapati si Babor nga indi malayo nga nakagamit sang iligal nga droga ang tatlo sang nanghold-up kag gindugangan pa nga nagbato ang manunudlo.
Ginapakamaayo naman ni Babor nga nasulbar kag makabig na nga case close ang kaso.
Nagalaom ang hepe nga ini ang magaserbe na nga paandam sa iban nga magagwa gid ang hustisya sa tion nga magbuhat sang krimen.
