Patay ang isa ka tricycle driver matapos gintiro sa Purok Santa Ana, Barangay 31, Bacolod City, kagab-i.
Suno kay Police Lt. Andy Ofalia, deputy station commander sang Bacolod Police Station 6, ang biktima ang ginkilala kay Christopher Guanzon, tumandok sang nasambit nga barangay apang nagapuyo sa karun sa Purok Progreso, Barangay Taculing, Bacolod City.
Suno kay Ofalia, santo sa pahayag sang bata sang biktima nga nakakita sa insidente, may nagasunod nga lalaki nga nagasakay sa pula nga motorsiklo samtang nagadrive sang tricycle si Guanzon kag sang papanaog na ini, siya ang hinali na lamang nga ginluthang sang isa ka bes kag naigo sa ulo.
Pagtsekyar sang mga responder, wala na sang senyales sang kabuhi si Guanzon.
Gindala ini sa ospital kag gindeklarar nga dead on arrival.
Nakuha naman sang naga-assist sa emergency room ang isa ka sachet sang suspected shabu sa bulsa ni Guanzon.
Suno man sa asawa sini, anay drug surrenderer sang 2017 ang biktima.
Suno sa deputy station commander, magapadulong kuntani si Guanzon sa puluy-an sang iya pamilya sa Barangay 31 agud magtambong sa kaadlawan sang iya utod.
Ini na ang ika-walo nga shooting incident sa ciudad sang Bacolod sa bulan sang Hunyo.
