Nakita sa imbestigasyon nga ginpatigayon sang Northern Negros Electric Cooperative (NONECO) nga illegal connection sa kuryente ang rason sang pagkapatay sa magtiyo sa Hacienda Carugiat, Barangay 13, Victorias City sang Setyembre 19.
Madumduman nga napatay ang magtiyo nga sanday Felix Aplasca, 60 anyos kay Dino Aplasca, 19 anyos kag lunsay mga residente sang Hacienda Alicante, Barangay Pasil, E.B. Magalona.
Si Dino ang una nga nakuryente matapos magsab-it sa metal nga karo ang kuryente nga may open wire, samtang nakuryente man ang senior citizen nga tiyo nga nagtuyo nga magbulig sa biktima.
Sa interview sang Bombo Radyo Bacolod kay NONECO General Manager Engr. Wilbe Bilbao, may yara sang naangot nga alambre sa kuryente padulong sa isa ka balay, apang sa karun wala pa sila sang impormasyon kun sin-o ang naga-istar diri.
Suno diri, nagpadala na sang sulat ang pamilya sang mga biktima sa ila opisina para magpangayo sang bulig kag ini pa ang ila nga diskusyunan sa board committee hearing kun sa ano nga polisa nila masulod ang paghatag sang financial assistance.
Apang, mismo si Bilbao ang una na nga naghatag sang assistance sa pamilya gikan sa personal sini nga kwarta.
Samtang, nagrequest man ang NONECO sa Victorias City Police Station sang imbestigasyon.
