Ginaseguro sang delegasyon sang Iloilo province nga kondisyon ang ila mga atleta agud mapanguyatan ang titulo bilang defending champion sa Western Visayas Regional Athletic Association (WVRAA) Meet 2024.
Ang WVRAA 2024 ang magasugod sa Mayo 2 tubtob 7.
Ang delegasyon sang Iloilo province ang yara sa billeting schools nga Andres Bonifacio Elementary School (ABES) 1 kag 2.
Sa interview sang Bombo Radyo Bacolod kay Nicasio Valenzuela, division sports officer sa Iloilo Province, by team ang ila nga pagbyahe padulong sa ciudad sang Bacolod.
Maayo man ang akomodasyon sa ila sa ABES 1 kag 2 kun sa diin apisar nga 55 lamang ka classrooms ang ginrequest nila sa ABES 1 sila ang ginhatagan sang masobra 80 ka mga classrooms.
Suno sa chairman sa kitchen, bastante man ang tubig nga ila magamit samtang wala man ang na-eksperyensyahan nga brownout.
Wala naman ang mga ini nagademand sang sobra-sobra sa host nga Negros Occidental kag co-host nga Bacood City government, kag kuntento na sila sa kun ano ang masarangan nga maprovide para sa ila.
Ini man ang una nga kahigayunan nga mismo ang Iloilo delegates ang nagpreparar sang ila pagkaon, bangod sa nakaligad nga mga kompetisyon sila ang nagapacater lamang.
Nahangpan naman sini ang mainit nga tiyempo bangod amo man ang mabatyagan sa diin man nga bahin sang Pilipinas.
Suno kay Valenzuela, ginkondisyon naman sang mga coaches ang mga kabataan agud maka-adjust sa temperatura.
Pahayag sini nga target nila nga madepensahan ang titulo bilang overall champion sa nakaligad nga WVRAA sa Aklan.
Paathag ni Valenzuela nga basta yara lamang sa kondisyon ang mga kabataan, malauman sa ila ang best performance.
Nagalaom ini nga kaangay sa nauna nga mga inadlaw, magapabilin nga matawhay ang ila sitwasyon tubtob nga matapos ang Regional meet.
Sila ang may medical team man nga ginpreparar inkaso may mga atleta nga makaangkon sang problema sa ikaayong lawas.
Tinguhaan sang mga ini nga mapauli ang dungog sa Iloilo City kag Iloilo province nga amo ang naghatag sang budget kag nagaserbe nga backbone sang ila delegasyon.
