Nagpanguna sa may pinakamadamo nga bulawan nga medalya sa Western Visayas Regional Athletics Association Meet 2024 sa elementary level ang probinsya sang Negros Occcidental samtang sa secondary level naman nagpanguna ang probinsya sang Iloilo, as of 6:00 pm kahapon.
Sa elementary level, ang Negros Occidental nga may 11 ka gold medal, 13 ka silver medal, siyam ka bronze medal; Iloilo nga may 10 ka gold medal, siyam ka silver medal, lima ka bronze medal; Aklan nga may siyam ka gold medal, tatlo ka silver medal kag anum ka bronze medal; Capiz nga may isa ka gold medal, tatlo ka silver medal, kag siyam ka bronze medal; Guimaras nga may duha ka silver medal kag duha ka bronze medal kag; Antique nga may isa ka silver medal.
Sa Secondary Level, nagapanguna ang Iloilo nga may 20 ka gold medal, 13 ka silver medal kag 13 ka bronze medal; Negros Occidental nga may 16 ka gold medal, 223 ka silver medal kag 17 ka bronze medal; Aklan nga may 11 ka gold medal, walo ka silver medal kag 11 ka bronze medal; Antique nga may duha ka gold medal kag duha ka bronze medal; Capiz nga may isa ka gold medal, apat ka silver medal kag tatlo ka bronze medal kag; Guimaras nga may duha ka silver medal kag apat ka bronze medal.
Sa interview ang Bombo Radyo Bacolod kay Hernani Escullar Jr., public information officer sang DepEd Region 6, generally peaceful ang ginapatigayon nga WVRAA meet 2024.
Suno diri, wala sang ano man nga untoward ukon major incidents nga nagluntad kag apisar nga may mga athletes nga napilasan kag na injured, handa ang medical personnel para magresponde.
Wala man sang problema sa pagtinir sang mga delegates sa billeting areas kag sa security nila.
Suno kay Escullar, padayon ang hinampang apisar nga gin-adjust ang oras sang games agud nga matapos ang tanan antes ang pagtakop sang WVRAA meet sa Mayo 7.
Pahayag ni Escullar, indi pa mahambal sa karun kun sin-o ang mangin champion bangod nga malawig pa ang hinampang kag madamo pa sang mga medalya nga nagahulat.
