Tuman ang pagpasalamat sang isa ka Ilongga nga iloy nga yara sa karon sa China sa nakuha sini nga mga suporta nagikan sa pamilya, mga katrabaho kag mga kakilala matapos nga siya ang nangin iloy makaligad ang walo ka bulan nga wala siya nakahibalo nga siya ang nagabusong.
Sa interview sang Bombo Radyo kay Ember Blue Marañon ukon ginatawag man nga si Teacher Blue, isa ka manunudlo sa Chiffon City sa Northern China, nagapasalamat gid siya sa Ginoo nga ginsabat ang iya madugay nga ginpangamuyo sa wala sini ginlauman nga pamaagi.
Ginpasalamatan man sini ang pagpalangga sang iya pamilya, amo kag mga katrabaho sa suporta sa iya kasubong man sa iya anak.
Nahangpan man sini ang mga nagabash sa iya bangud bisan siya ang natingala man kag tubtob sa karun indi siya makapati nga natabo sa iya ang isa ka butang nga imposible.
Si Ember Blue Marañon ang una nga nakabatyag sang sakit sa iya pus-on sang Setyembre 22 kag gindumdom sini nga manug-abot lang ang iya menstruation gani iya lang ini ginpabay-an.
Setyembre 24 sang gindala ini sang iya mga upod sa ubra, lunsay mga Chinese national, sa isa ka ospital agud magpakunsulta bangud wala gihapon nadula ang sakit nga iya ginasuprer.
Bangud nga Chinese ang doktor kag indi makaintindi ang Ilongga, nagapatranslate nalang si Marañon sa iya nga kaupdanan.
Ginkulbaan naman ini matapos nga makita ang reaksyon sang iya mga upod sang sila ang ginaistorya sang doktor nahanungod sa iya sitwasyon.
Sa bulig sang iya mga abyan kag upod sa ubra, natukiban sini nga walo na siya ka bulan nga nagabusong.
Natingala si Marañon bangud nag-abot ang iya menstruation sang Hulyo apang gin-athag sang doktor nga posible gindugo lang ini tuga sang stress kag kakapoy.
Wala pa nakamove-on sa nabatian nga balita, nadugangan pa gid ang kakibot sang maestra sang ginpahayag sang doktor nga mabata na ini ora mismo.
Aminado si Marañon nga indi pa ini handa apang yara na ini sa sulod sang labor room kaupod ang anum ka mga doktor.
Nagpanugyan man ini sa mga kababainhan nga magpacheck up kun may nabatyagan nga masakit sa lawas ilabi na sa tiyan agud indi matabo sa ila ang natabo sa iya.
