BACOLOD CITY – Naandan na sang isa ka Pinoy sa banwa sang Stockton-on-Tees sa North East England sa pungsod United Kingdom nga magbulig sa mga isig-kapareho sini nga nangin rason man sang pagbaton sini sang Service to Community Award.
Sa exclusive interview sang Bombo Radyo Bacolod kay Victor Manejero, kapin anom na katuig sa nasambit nga lugar, tagsa may mga bag-uhanon nga Pinoy nurses ukon Overseas Filipino Workers (OFWs) nga nagaabot sa Stockton-on-Tees, ila ini gina-sugata agud abi-abihon.
Samtang kun makaangkon naman sang problema ang mga ini, siya gilayon ang ginatudlo nga amo ang makabulig sa ila.
Bangud sang iya pagka-mabinuligon sa mga pareho sini nga Pinoy, ginbansagan na si Manejero nga “Mayor Victor” kag “Governor Victor” bangud siya ang masami makalubad sang problema.
Apang suno kay Manejero, naluoy lamang ini sa mga bag-uhanon nga Pinoy sa luwas bangud wala sila sang iban nga makadtuan sa tion sang ila pag-kinahanglan.
Ginpabutyag sini nga ang pagka-mabinuligon ang iya natun-an sa ila man mismo pamilya nga gikan man sa pigado nga pangabuhi sa banwa sang Janiuay, probinsiya sang Iloilo.
Magluwas sa pagbulig sa pareho sini nga mga Pinoy sa Stockton-on-Tees, si Manejero man ang nagpanguna sa pagdala sang kultura nga Pilipino sa nasambit nga lugar
Suno kay Manejero, sumugod sang nagligad nga tuig, gin-engganyo sini ang kapin 300 ka pamilya nga Pinoy ukon masobra isa kalibo ka mga kasimanwang Pilipino sa nasambit nga banwa nga patigayunon ang mga kustombre nga ginahimo man diri sa Pilipinas.
Ini kaangay na lamang sang Flores de Mayo sa bulan sang Mayo kag ang paghiwat sang Misa de Aguinaldo sa bulan sang Disyembre.
Suno kay Manejero, tuman kalayo sang pagsaulog sang Paskwa sa UK kun ikumparar sa Pilipinas sa pihak nga madamo man sang Kristyano didto.
Bangud sini, isa-isa sini nga ginlibot, upod sa iban pa nga katapo sang Stockton-on-Tees Filipino-British Community, ang mga pamalay agud engganyuhon ang mga ini nga mag-Simbang Gabi.
Suno kay Manejero, nangin madinalag-on ang ila ginhimo bangud madamo ang nagpasakop kag nalipay diri.
