BACOLOD CITY-Konsensiya ang nagtulod sa iloy agud akuon ang kahilabtanan sa kamatayon sang iya live-in partner kag ila bata sa Hacienda Pula, Brgy. Kapitan Ramon Silay City, Lunes sang gab-i.
Gin-ako ni Rogelia Landao, live-in partner sang ginpatay nga si Antonio Padua, 64-anyos kag iloy sang 7-anyos nga babaye nga nasaksihan sini ang pagpatay sa mga biktima kag ang nagpangamot amo ang iya umagad nga si Arnel Aguilar sang Hacienda Napilas 7, Brgy. E Lopez, Silay.
Suno diri, ginplano nila ni Aguilar nga hold-apon si Padua apang indi nila plano nga patyon ini kag ang iya bata.
Domingo pa lang sang hapon sang nag-teksanay sanday Landao kag Aguilar tuhoy sa ila plano.
Lunes sang gab-i, nagpadulong si Aguilar sa Hacienda Hawaiian sa pagdumdum nga may selebrasyon didto sang ika-7 nga kaadlawan sang bata nanday Padua kag Landao.
Sang nahibaluan nga wala didto sang handa, nag-inom na lang sang makahulubog nga ilimnon si Aguilar kag sang tuman na ini ka hubog nagkitaay na sila ni Landao sa unhan sang balay ni Padua kag dungan nga nagpadulong didto.
Tuyo nila nga magpangayo sang kwarta apang wala sang may ginhatag si Padua tubtob nga nagkalalisay sila nga duha kag ginbuno na ini sang suspetsado.
Suno kay Landao yara man siya sa tupad sang iya live-in partner samtang ginabuno sang iya umagad kag pagkatapos ginbuno, ginputos niya ini sa habol kag gin sunog.
Pagkatapos sang amay, gingutrab naman ni Aguilar ang liog sang bata kag ginhaplak sa amay nga nagakasunog pa.
Suno kay Landao wala gid ini nakasaway sa iya umagad kag tubtob ginalantaw na lang sini sa ila bintana ang ginahimo sang suspek sa mag-amay.
Matapos ang krimen, nagpalagyo sa kilid sang kampo si Landao tubtob mag-aga samtang nagpauli naman si Aguilar sa ila puluy-an.
Martes sang aga sang may nakasapo sa bangkay sang mag-amay sa ila puluy-an.
Nahibaluan nga kahapon, ginpabangdan pa ni Landao ang mga pakaduha ni Padua nga amo ang suspetsado sa krimen bangud sang away sa duta.
Magluwas diri, gintudlo man sini si Aguilar nga may nakakita sa iya nga nagbiya sa puluy-an nanday Padua, Martes sang kaagahon.
Sa karun priso na sa Silay City Police Station sanday Landao kag Aguilar kag natalana nga pasakaan sang nagakaigo nga kaso.
Sa impormasyon nga nakuha sang Bombo Radyo, magluwas kay Padua may gina-upod naman nga bag-o si Landao.
