Patay ang iloy kag duha ka magagmay nga kabataan matapos gintiro sang iya mismo live-in partner sa 4th Street, Greenland Subdivision, Barangay 4, Himamaylan City, Negros Occidental, alas-6:30 kaina sang aga kag gilayon man nga naghikog ang suspetsado.
Sa interview sang Bombo Radyo kay Police Lt. Col. Romeo Vargas, hepe sang Himamaylan City City Police Station, gintiro sang 59-anyos nga si Raymundo Diaz sa ulo si Mary Rose Egca nga nagaselebrar pa sang 24th birthday subong nga adlaw.
Sang patay na si Mary Rose, gintiro man ni Diaz sa ulo ang duha nila ka kabataan.
Si Ruth Esther Diaz ang nagaedad sang isa ka tuig kag siyam ka bulan samtang ang agot nga lalaki nga si Job ang nagaedad sang pito ka bulan.
Sang patay na ang tatlo, gintiro ni Diaz ang iya ulo sa sala sang balay apang ini ang nakasalbar kag gindala sa ospital sa Bacolod.
Apang ala-1:10 subong nga hapon, ginbawian na sang kabuhi si Diaz.
Suno kay Vargas, super .38 caliber pistol ang gingamit ni Diaz sa pagtiro sa iya live-in partner kag duha ka kabataan.
Sa pag-usisa sang mga pulis sa timbang sang maglive-in partner, iya gintuad nga nagahimos si Egca nga magpadulong sa ila balay sa Sitio Pukatod, Barangay Payao, Binalbagan agud didto magselebrar sang birthday apang nagbais sila ni Diaz kag nakibot na lamang ang mga kabulig nga may linupok sa sulod sang balay.
Sang nagresponde ang mga pulis, nakit-an ang bangkay ni Mary Rose kag Ruth Esther sa sulod sang kwarto samtang nagakaya naman ang bata nga lalaki sa atubang sang pwertahan sang kwarto kag nagapaligo sa kaugalingon nga dugo.
Subong nga adlaw, ginaselebrar man kuntani ang 7th monthsary sang pagkabun-ag ni Job.
Si Diaz ang nagabaligya sang relief nga mga bayo sa Himamaylan City apang temporaryo ini nga nag-untat bangud sa COVID pandemic.
Si Egca naman ang nagabulig sa pagpadalagan sang ila nga negosyo.
Sa karon, nagabaton ang negosyante sang prenda kaangay sang tricycle ukon motorsiklo.
Suno sa bata ni Diaz sa una niya nga asawa, nagasuprer ang suspetsado sang pneumonia kag diabetes.
Wala pa man sang may nakatuad kun may problema ini sa paminsaron nga nagtulod nga nahimo niya ang krimen.
Suno kay Police Lt. Arturo Margallo Jr., deputy chief sang Himamaylan City Police Station, wala sang kriminal rekord sa ila police station si Raymundo Diaz.
Usisaon naman kun may nagakaigo nga papeles ang pag-possess sang suspect sang armas-luthang.
