Nagahilibion ang iloy sang 27 anyos nga babayi nga ginhatok-hatok labo sang kaugalingon nga amay sa Purok Kawayanan, Barangay Barera, Sagay City, Negros Occidental bangud sa natabo sa iya anak.
Sa interview sang Bombo Radyo Bacolod kay Marilyn Sulan, indi man ini makapati nga mismo ang bana sini ang makapatay sa ila mismo anak.
Suno kay Sulan, maldita man ang iya nga anak kag masami sila nagakamugay sang amay sini.
Ginpahayag sini nga ang ginhalinan sang nagluntad nga krimen amo ang paghampang sang tubig sang siyam ka tuig nga bata sang biktima sa banyo sang ila lolo samtang nagapaligo.
Bangud sini, nagbaisay ang biktima nga si Roselyn Sulan kag ang amay sini nga si Richard Sulan.
Suno kay Marilyn, si Roselyn ang nagapangakig kun akigan ang anak sini kag bisan siya ang napaagyan man sang biktima sang gin-akigan sini ang iya nga apo.
Suno diri, bisan siya wala man nakahibalo kun ano klase sang paminsaron may ara ang biktima nga indi maluyag nga sawayon ang bata sini bisan pa nga sutil ini kag nagasagsag ang batasan bangud ginaapinan sang iloy.
Mismo ang mga utod sang biktima ang indi makapati nga nahimo ini sang kaugalingon nila nga amay sa ila nga utod.
Nagapanawagan si Marilyn sa may maayo nga kabubut-on sang bulig agud nga makuha ang bangkay sang biktima kag mapalubong ini.
Naghibi man ang suspek matapos nga nahimasmasan sa nahimo sini kag gin-ako man sini nga siya ang nagpatay sa ila anak.
Nakahunong na sa Sagay City Police Station ang iya bana agud nga marealisar ang ginhimo kag nagapangabay nga indi na sini pagliwaton ang iya ginhimo sa ila mismo nga anak bangud kun masulit, ipapriso niya nalang ini.
Samtang, ginpahayag sang utod ni Roselyn Sulan nga mahimo naimpito ang amay sini gani ginhatok-hatok sini labo ang biktima ilabi na nga may daan na ini nga kaakig.
Sa interview sang Bombo Radyo Bacolod sa magulang sang biktima, nangusisa ini sang nag-abot gikan sa meeting sang iya bata sa eskwelahan, suno sa anak sini nga nagpaligo sila sa banyo kag nagbangon ang ila nga Lolo agud magpangihi.
Suno diri, ginsaway sang Lolo ang apo bangud nagahampang sang tubig samtang napaligo apang nagsabat ang isa sa anak sang biktima.
Nagpanugid ang hinablos sini sa iya iloy kun sa diin nagluntad ang pagbinaisay nga nagresulta pa sa pagsulong kag paglagas ni Roselyn Sulan sa amay sini nga si Richard Sulan sang espading.
Samtang ang ila amay ang may yara man sang talibong apang may nagpugong man sa suspek agud indi malab-ot ang biktima.
Naglakat man si Roselyn agud ireport ang ila amay sa barangay apang wala ini nadayon bangud nagbalik ini.
Ginpunggan man sang magulang ang manghod sa pagbalik bangud nakita sang mga ini nga akig na ang ila amay nga apang wala namati ang biktima.
Bangud nagbalik ang biktima, didto na ini ginhatok-hatok labo sang suspek.
Nakaagom ini sang madamo nga pilas sa ulo kag nautod pa ang nawala sini nga kamot.
Wala man ang mga ini naglaom nga mahimo ini sang iya amay sa ila manghod bangud masami man ang mga ini nagalalisay.
Suno diri ginatugyan nila sa ila nga iloy kun ano ang plano sini para sa ila amay nga nagpatay sa ila manghod.
