Ang isa ka nanay na lamang sa karun gikan sa siyam ka mga nagkalabungguan sang tricycle sa atubang sang Sum-ag Catholic Church ang nagapabilin sa ospital.
Madumduman nga pito ka kabataan kag duha ka iloy ang na-ulamid sang hinali na lamang nga namunggo ang tricycle nga ginamaneho sang 76 anyos nga lalaki nga gina-alegar naglain ang pamatyag.
Magluwas diri, daan naman ang tricycle sang suspetsado.
Sa interview sang Bombo Radyo Bacolod kay Police Major Ramel Sarona, pinuno sang Traffic Enforcement Unit sang Bacolod City Police Office, ang mga kabataan kag duha ka ginikanan ang nagtabok sa pedestrian lane gikan sa Sum-ag Elementary School.
Sila ang nakalampuwas na sa highway sang nag-abot ang tricycle nga madasig ang dalagan kag nagliko man sa ila nga pwesto.
Suno kay Sarona, ang iloy nga si Hailey Cuenca sang Purok Mahinangpanon, Barangay Punta Taytay ang una nga nakatalupangod sa padulong nga tricycle.
Agud indi matam-an sa impact ang mga kabataan, ginpili sini nga balabagan ang tricycle gani siya ang nagsuhot gid sa idalom kag nakaangkon sang fracture sa nawala nga tiil.
Sa pihak nga bahin, apisar pito ka kabataan ang recorded sang kapulisan nga apektado sa insidente, anom lamang ang gindala sa Bacolod South Hospital upod sa duha ka iloy.
Ang driver sang tricycle ang ginalantaw nga mahimo pasakaan sang kaso nga reckless imprudence resulting to multiple injuries, apang ini ang magadepende pa sa pag-estoryahanay sang duha ka partido.
