BACOLOD CITY-Nagdangop sa Bombo Radyo Bacolod ang mag-iloy agud magpangayo sang bulig para sa apo nga may ginabatyag nga balatian.
Ang lapsag nga lima ka bulan ang ginkilala kay Baby Katelyn Matison Alimpuyo, may balatian nga osteoma ukon bone tumor sa natuo nga bahin sang agtang.
Suno sa iloy sini nga si Irene Alimpuyo, 20 anyos, residente sang Brgy. Sta. Cruz, Murcia, ginbata ang lapsag sadtong Enero 14, 2020 paagi sa normal delivery.
Normal ang lapsag apang amat-amat nalang nga nakita ang gamay nga bukol sini sang nagtuntong sa tatlo ka bulan.
Madasig naman nga nagdako ang bukol sini kag gindeklarar nga delikado nga balatian.
Gin-ultrasound ang bata sa Riverside Hospital kag nakita diri ang posibilidad sang osteoma.
Ang Osteoma amo ang benign nga pagtubo sang tul-an sa skull ukon isa ka sahi sang bone tumor kag ginarequest nga magpaidalum sa Magnetic Resonance Imaging (MRI) apang magalab-ot sa P18,000 tubtob P20,000 ang balayran.
Bangud sa kakulang sa ginakinahanglan nga bulig, nagdangop ini sa estasyon sang Bombo Radyo Bacolod agud nga mabuligan sa pagpangita sang mga may kabubut-on sa paghatag nga mga tagpalamati nga magabulig pas-an agud nga maoperahan ang lapsag.
Nagahingyo man sang bulig ang lola sang lapsag nga si Sherly Mabilog nga mabuligan ang apo bangod naubusan na sila sang galastuhon.
Nadulaan man ang mga ini sang trabaho bangod sa crisis sa COVID-19 pandemic, gani daku gid nga pasalamatan para sa mga ini kun may-ara sang magapalab-ot sang bulig.
Sa mga luyag maghatag sang bulig, sarang gid makapakig-angot sa numero ni Irene nga 09272615190.
