Hugot nga gin-panginwala sang iloy nga ginakabig nga high value target nga ginapanag-iyahan sini ang nakompiskar nga druga sa ginpatigayon nga buybust operation kagab-i sa Purok Lison, Brgy. 1, Bacolod City.
Madumduman nga gin-aresto si Arlene Arnaiz, 26 anyos kag, residente sang Purok Tilapia, Brgy. 3, Bacolod City kag nakuhaan ini sang 270 gramos sang shabu kag nagabalor P3.2million.
Sa interview sang Bombo Radyo Bacolod kay Arnaiz,ginpanginwala sini nga iya ang druga nga nakumpiskar sang otoridad apang gintuad sini nga ginapanag-iyahan ini sang bag-o niya nga nobyo nga si Boboy Dacumos.
Aminado man ini nga nagagamit siya sang iligal nga druga.
Sa karun, may impormasyon na ang mga kapulisan kun sa diin nagakuha sang iligal nga druga ang suspetsado kag padayon nga nakahunong sa Police Station 8, Bacolod City si Arnaiz.
Samtang suno kay BCPO spokesperson Police Lieutenant Colonel Ariel Pico, yara sa watchlist si Arnaiz.
Suno diri, newly identified nga drug personality si Arnaiz apang nahulog ini sa high value target bangud sa kadamuon sang shabu nga nakuha sa iya possesyon.
