Nagapanawagan sang hustisya ang iloy ni Pearl Joy Ortiz Galve, Grade 10 student nga nasapwan nga nagaka-agnas na nga bangkay sa sulod sang kampo sa Hda. San Roque, Barangay Cubay, La Carlota City, kahapon sang aga.
Sa interview sang Bombo Radyo Bacolod kay Jennifer Galve, sang Hulyo 29, nagchat si Pearl Joy sa iya pakaisa nga may tabuon sila para kuhaon ang motor nga ihatag sa iya, apang wala nag-upod ang iya pakaisa.
Suno diri, alas- 9:00 sang aga nagpangayo sang load si Pearl Joy sa iya kag iya man ini ginhatagan.
Pagbuhi sang udto, naggwa sa eskwelahan si Pearl Joy kag nakita ini sang iya stepfather nga yara sa likod sang elementary school kag ginpamangkot kun diin ini makadto.
Nagsabat ini nga sugaton sini ang iya manghod nga may ginbakal lang.
Nagsakay ini sa motorsiklo upod sa iya stepfather kag manghod apang paglab-ot sa bangga padulong sa iya nga eskwelahan nanaog ini bangod nga luyag na lamang sini nga maglakat pasulod.
Samtang, may nakakita naman sa kay Pearl Joy nga kilala man sang ila pamilya, nga may ginahulat ini sa tabok sang 7/11 sa Brgy. Sum-ag kag sang ginpamangkot kun nakalisensya ini sa iya iloy nga siya ang may kadtuan nagsabat ini nga wala na kay mabalik lang man siya gilayon.
Nagdangat ang gab-i kag wala ini nakapauli kag siya ang ginmessage na ni Jennifer apang naga-seen lamang ini kag wala nagareply, gintawagan man ini sang iloy apang bisan nga ginsabat wala naman ini nagahambal kag ginapatay ang tawag.
Kasunod sini amo nga gin-block na ni Pearl Joy ang iya iloy sa messenger kasubong man ang iya mga pakaisa.
Samtang, pagkasunod nga adlaw, nakit- an man ini nga nagakaon sa isa ka kalan-an sa Brgy. Sum-ag nga may kaupod nga lalaki nga ginabanta naga-edad 30 pasaka kag may tattoo sa kamot kag liog.
Tubtob sa karun, padayon nga naga-online sa messenger ang account ni Pearl Joy apang wala ini nagareply.
Pahayag ni Jennifer, tuman ang kasakit nga nabatyag sini sang makit-an ang natabo sa iya nga bata amo nga nagapanawagan ini sang hustisya.
