Gintuad sang iloy ni Pearl Joy Galve nga nakabaton ini sang pagpamahog gikan sa iya live-in partner kag iban pa nga mga tawo.// Suno kay National Bureau of Investigation (NBI)- Bacolod Head Atty. Manuel Fayre Jr., 101 percent sini nga ginapatihan ang pahayag ni Jennifer Galve nga amo ang iloy ni Pearl Joy.
Suno diri, nagtuad si Jennifer nga nakabaton ini sang pagpamahog gikan sa ka-live in sini nga si Rene John Nasis alyas ‘Negro’.
Antes pa man nasapwan ang bangkay ni Pearl Joy sa ciudad sang La Carlota, naghambal na si Jennifer kay Negro nga kun may kahilabtanan ini sa pagkadula sang iya bata, iya gid ini nga isugid sa pulis.
Apang nakabaton ini sang pagpamahog gikan kay Negro nga kun siya ang manugid, patyon sini ang iya pamilya.
Gintuad man ni Jennifer nga may nagakabatonan man ini nga pagpamahog gikan sa iban nga mga tawo.
Bangod sini, nagpasalig si Fayre nga hatagan sang seguridad ang safety sang pamilya Galve.
Suno kay Fayre, ginakabig sa karun si Negro bilang number 1 suspect sang NBI kag posible nga may mga kaupdanan pa ini.
Samtang, isa sa ginalantaw man nila nga scenario amo nga posible ginbaligya ang 15 anyos nga dalagita kag wala man kuntani sang intensyon nga patyon ini apang indi pa gid sa karun matumod kun ano ang rason ngaa ginpatay si Pearl Joy
