BACOLOD CITY-Mabaskog ang panagupnop sang iloy sang Negrense Binibining Pilipinas 2019 candidate nga si Vickie Marie Rushton nga makakuha na sang korona ang iya bata sini nga tuig.
Sa exclusive interview sang Bombo Radyo Bacolod kay Theresa Rushton sa ila mismo puluy-an sa ciudad sang Talisay, ginpahayag sini nga “destiny” ang pag-angkun sang korona sa beauty pageant apang dako ang iya panagupnop nga makoronahan na si Vicky sini nga tuig.
Apisar sang dako nga paglaom nga makakuha sang korona ang iya bata, may pahanumdom man si Mrs. Rushton kay Vickie nga ang pageant “50-50” ukon 50% expectation kag 50% frustration.
Ini ang masami ginapahanumdom sang iloy sa beauty queen agud nga indi ini ma-frustrate pananglitan mangin mapait ang kapalaran kag indi ini makakuha sang korona.
Bug-os ang suporta sang pamilya sa journey ni Vickie sa Binibining Pilipinas kag alas-7:00 kagab-i, naglupad na pa-Manila ang iya iloy kag pila nila ka himata para sa coronation night sa Domingo sang gab-i.
Si Vickie Marie Milagrosa Sausa Rushton ukon si “Vim” para sa iya pamilya ang nangin first runner-up nagligad nga tuig kag ginkoronahan man ini nga Lin-ay sang Negros kag Mutya ng Pilipinas sang 2011 kag girlfriend sang actor nga si Jason Abalos.
