Ginkumpirmar ni Negros Occidental Provincial Administrator Atty. Rayfrando Diaz nga negatibo ang resulta sang swab test nga ginpatigayon sa 35-anyos nga iloy nga residente sang Valladolid sang Lunes nga suno sa Philippine Genome Center, amu ang labing una nga kaso sang Lambda variant sang COVID-19 sa Pilipinas.
Madumduman nga matapos nagwa ang resulta sa PGC nga positibo sa Lambda variant sang COVID-19 ang 35-anyos nga iloy, ginreswab ini kag ang iya bata sang Lunes kag ginpasa sa Valladolid Molecular Laboratory.
Sa interview sang Bombo Radyo kay Diaz, ang resulta ang nagwa alas 7:20 kahapon sang aga kag lunsay negatibo ang iloy kag bata sini sa re-swab test nga ginpatigayon.
Suno diri, ini ang nagapakita nga kinahanglan gid nga iverify ang mga reports nagikan sa Philippine Genome Center antes batunon bangud indi madula ang posibilidad nga may mga error sa mga impormasyon nga ginahaboy.
Gindugang man sini nga ini ang nagapakita lamang nga wala sang Lambda variant sa Negros Occidental.
