Halos indi naman ma-estorya kag nagahilibi-on na lamang ang iloy ni Quenie Aguirre, ang 5 anyos nga namissing sang Disyembre 21 kag nasapwan kaina nga wala na sang kabuhi sa sapa sa Prk Sto Domingo, Brgy Handumanan, Bacolod City sang ini ang ila gintawagan kag ginpahibalo nga kumpirmado nga ang iya nga bata ang nasapwan.
Sa interview sang Bombo Radyo Bacolod kay Mary Rose Acostan, tiya ni Quenie, nakaligad pa luyag magpauli sang iloy nga nagapangamo sa Manila agud kuntani makabulig sa pagpangita, apang kagab-i lamang ini maswelduhan.
Kulang naman ang pamasahe sini sa pagpauli bangod sa pagmahal sang ticket sa eroplano.
Kaina nagcommit si Punong Barangay Febe Legaspi sang Brgy Handumanan nga buligan nga makapauli ang iloy upod sa duha pa sini ka kabataan nga edad 15 kag 17 anyos.
Samtang ginakatingala naman ni Acostan kun paano nakalab-ot sa area ang bata nga kapin kilometro na ang kalayuon gikan sa ila.
Suno diri, apisar nga tupad sang sapa ang ila nga balay kag ang konektado sa sapa kun sa diin nasapwan ang bangkay, wala makita nga senyales nga may nakadanlog sa pangpang.
Ginhusoy man sang mga pakaisahan sang bata kag mga kaingod ang sapa apang ini ang wala makita.
Suno kay Acostan kun nahulog sa sapa, may-ara sang mga nagabaral sa isa ka taytay nga masab-itan sang bata gani makatilingala nga ini ang nakalab-ot sa Prk Sto. Domingo.
Aminado ini nga nagsaka gid man ang tubig sa sapa sang Disyembre 21 bangod sa pag-ulan ulan apang ini ang katunga lamang kag wala man nag-awas.
Suno diri, mahibaluan sa eksaminasyon sang SOCO kun ano ang kinamatay sang bata, kag kun may posibilidad nga may nagtandog diri.
Pahayag ni Acostan nga ang amay ni Quenie ang nagtaliwan duha na ka tuig ang nakaligad.
