Gin-ayo sang iloy sang biker nga si Rolly Ray Alejo sang Barangay Vista Alegre diri sa ciudad sang Bacolod ang mga netizens nga indi pagpasobrahan ang pag-bash sa bata niya bangod basi kun madepress ini kasunod sang natabo sang 1st Balik Yuhom XC Race sang Oktubre 2 kun sa diin ginpainom niya sang tubig nga halin sa turugban sang karbaw ang bike nga si Khylie Nicole Montecado.
Sa interview sang Bombo Radyo kay Fatima Alejo, nagpangayo ini sang pasaylo kay Kylie Nicole Montecado, sa pamilya sini kag sa publiko sa nahimo sang iya bata.
Suno kay Fatima, mabudlay istoryahon si Rolly Ray subong, may ara man sang mga pila ka beses nga nagatulala ini kag indi maintindihan.
Suno sa iloy, nga indi hungod ni Rolly Ray nga ipainom kay Montecado ang tubig gikan sa sapa bangud plano lamang kuntani sini nga ibubo sa biker.
Wala man sang problema sa ila kun gustohon ni Montecado nga mag-isturya para nga magklarohay.
Suno kay Mrs. Alejo, mabuot nga bata si Rolly Ray, eskwelahan-balay lamang ini kag ang hobby niya ang magbike, kun sa diin nagtrabaho ini bilang construction worker para lang nga mabakal ang gusto nga bike.
Sa karun, may ara sang blotter sa Police Station 5 kun sa diin magaisturyahanay ang duha ka bahin sa masunod nga semana.
